اسلام آباد(صباح نیوز)امیر جماعت اسلامی سراج الحق ملائشیا کے پانچ روزہ دورہ کے بعد وطن واپس پہنچ گئے۔ اسلام آبادائیرپورٹ اترنے کے بعد امیر...
اسلام آباد(صباح نیوز)امیر جماعت اسلامی سراج الحق ملائشیا کے پانچ روزہ دورہ کے بعد وطن واپس پہنچ گئے۔ اسلام آبادائیرپورٹ اترنے کے بعد امیر جماعت نے وفاقی دارالحکومت میں قائم جماعت اسلامی اور الخدمت فاؤنڈیشن کے فلڈ ریلیف کیمپ کا دورہ کیا اور کارکنان کی امدادی سرگرمیوں کو بھرپور طریقے سے جاری رکھنے پر تحسین کی۔
اس موقع پر گفتگو کرتے ہوئے سراج الحق نے کہا کہ جماعت اسلامی اور الخدمت کے سیلاب زدہ علاقوں میں ہزاروں کارکنان اور رضاکاران خدمات انجام دے رہے ہیں۔ انھوں نے کہا کہ ہم سیلابی علاقوں میں مکمل بحالی تک چین سے نہیں بیٹھیں گے۔
انھوں نے جماعت اسلامی اور الخدمت فاؤنڈیشن پر بھرپور اعتماد کرنے پر قوم کا بھی شکریہ ادا کیا۔یاد رہے امیر جماعت نے اپنے دورہ ملائشیا کے دوران اسلامی تحریکوں کی عالمی کانفرنس میں شرکت اور یونیورسٹی آف ٹیکنالوجی پٹروناس میں پاکستانی طلبہ سے ملاقات اور خطاب کیا۔ انھوں نے کوالالمپور میں پاکستانی کمیونٹی کی جانب سے منعقدہ ایک تقریب سے خطاب کیا اور ملائشیا میں پاکستانی سفیر عامنہ بلوچ سے ملاقات بھی کی۔ امیر جماعت اسلامی سراج الحق نے کوالالمپور میں پاکستان کی سفیرآمنہ بلوچ اور دیگر ذمہ داران سے ملاقات کی۔
اس موقع پر باہمی دلچسپی کے امور اور سیلاب زدگان کی امداد سے متعلق موضوع زیربحث آئے۔ امیر جماعت نے کہا کہ موجودہ حالات کا تقاضا ہے کہ قوم متحد ہو کر مصیبت زدگان کی مدد کرے۔ انھوں نے کہا کہ بیرون ملک پاکستانیوں کی سیلاب زدگان کے لیے کاوشیں لائق تحسین ہیں۔ جماعت اسلامی اور الخدمت فاؤنڈیشن سیلاب زدہ علاقوں میں امدادی سرگرمیاں بھرپور طریقے سے جاری رکھے ہوئے ہے۔ اس موقع پر جماعت اسلامی کے شعبہ امور خارجہ کے ڈائریکٹر آصف لقمان قاضی بھی موجود تھے۔
کوئی تبصرے نہیں