اگر آنسو بہانے، سینہ کوبی، چاک دامانی سے فرصت ہو تو لمحہ بھر ہمارے پاس آ بیٹھو،،، ہماری نم زدہ آنکھیں، ہمارے غم زدہ چہرے، عقیدت بار نظریں، م...
اگر آنسو بہانے، سینہ کوبی، چاک دامانی سے فرصت ہو تو لمحہ بھر ہمارے پاس آ بیٹھو،،،
ہماری نم زدہ آنکھیں، ہمارے غم زدہ چہرے، عقیدت بار نظریں،
محبّت اور مودت سے لبالب جسم و جاں اپنے،،،
ہماری خامہ فرسائی، ہماری خامہ آرائی،
صریر-دل، فشار-خوں،
خیال و سوچ، گویائی، سماعت،
رہین-عمدگی سب کچھ،،،
شبِ عاشور۔۔۔ شب بھر گریہ زاری،
تردد ہاۓ شام-غم۔۔۔ عزاداری،،،
سبیلیں، صدقہ و خیرات، جذب و شوق-غم خواری،،،
یہ سب کچھ۔۔۔ اور بہت کچھ،
بنامِ حضرت-سردار-جنت، نشین-مسند و منصب وعہدہ ہاۓ دلداری،
یہ ہوتا ہی، ہمارے بعد بھی ہو گا، یہ ہونا چاہیے بھی،،،
مگر سوچو!
یہ کیسی بد نصیبی ہے
کہ مہروماہ کے ہوتے
ستاروں ہی پہ تکیہ،
گل و بلبل کے ہوتے چند کلیوں پر قناعت،،،
سمندر سامنے ہے۔۔۔ اور ہم قطروں پہ نازاں اور شاداں اور فرحاں ہیں،،،
گہر، موتی، زمرد، لعل۔۔۔ عقیق و نیلم و مرجاں سے بے بہرہ،،،
شہادت گاہ-الفت کے ادب آداب سے نا بلد،
صبر، تسلیم و رضا کے ثمر سے نا آشنا،
امر باالمعروف سے دامن کشیدہ،
منکرات اور کار-ناحق پر تفاخر ریز رہتے ہیں،،،
*"یزیدیت سے پورا سال ہم لبریز رہتے ہیں"*
*یہ کتنی بد نصیبی ہے،،،،،!!!*
*(طاہر وحید)*
کوئی تبصرے نہیں